|| হোসনে আরা হেনা ||
আমার মন ভালা নায় গো,
মন ভালা নায়,
না পিন্দছি দুল,না পিন্দছি চূড়
দেখো না গলাত মালা নায় !
চউখোর কাজল মুছি গেছে,
চউখোর পানির ধারায়
পিন্তাম যেন গো চুড়ি, শাড়ি
মন তো না আগ বাড়ায়।
লাল বুটিদার ‘ রুলেক্স ‘ শাড়ি
গেলো ফাল্গুন মাসও।
কতো সখে দিছলায় গিফট যেন
কইছলায়,এবুল আসো।
শাড়ির জাগাত শাড়ি রইছে
ভাইনজ না ওইলো খুলা,
তুমি কান্দাত না থাকলে কও
মন লাগে নি দোলা ?
এমন পাষাণ ওইলায় তুমি
হউ যেন ছাড়লায় ই দেশ,
কিলান ভুললায় আমায় তুমি
ভুললায় কুটুম্ব আর খেশ !
কতো খত্ যেন লেখলাম আমি
না আইলো ফের চিঠি,
তুমার পন্থপানে চাইয়া
আন্ধা ওই যার দিঠি।
আল্লাহয় জানোইন, কার প্রেমও যেন
মজলায় তুমি আইজ,
ই পুরিরে পাইলে কান্দাত
করমু দেখবায় সাইজ !
গুসাগাসায় কইয়ার ইতা
তাইর বা কিতা দুষ !
তুমার মাঝে হক্কল ভেজাল
থাকলে না সেন হুশ !
দুনছলা এক মাইনষোর লাগি
আমার কাঁন্দনকাটি,
মুর্তার বেত দি বানাই তেবো
নকশার শীতলপাটি।
কথা আছিল পাটিত বইয়া
চান্দোর জোছনা দেখমু,
ভালাবাসার গান গীত লইয়া
একখান পইদ্য লেখমু।
ইতা মাত যেন পাউরিলাইলায়,
রইলাম আমরা যে যার
‘মন ভালা নায়’ দিয়া গেলায়
এমন কঠিন বেমার !
আমার মন ভালা নায় গো
মন ভালা নায়,
যায় দিন ভালা– আয় দিন যায় যেন
চউখ্খোর বারিধারায়।
